مكتبه الفنان الراحل / مصطفى سيداحمد

عينيك مدن - صلاح حاج سعيد

عينيك مدن
منسية فى كتب التواريخ والزمن
عينيك وطن
مشدود على وتر التباريح والشجن
مشدود على حروف الكتابة
مكدود عَنا .. ومكتول صبابة
وفيهو حطّ النيل .. سكنْ
***
عينيك سفر
مكتوب أعيش فى غربتو
وأعشق عذابو .. وحُرقَتو
وليلو الطويل
وأتخيـّلك يا حلوة زى نسمة سحر
جيتى ومعاك .. حلمى المطوِّل منتظر .. وعدو الجميل
عشقك زمان .. جوّاى رحل
وإتناهى فى الأعماق .. أمل
ضمخ رؤاى .. إحساس نبيل
أذهل طيوف خاطرى القبيل
.. جاشت ملامحك روعتو
وضجّ السكون .. فى وحشتو
والكان أمل فى عيونى .. لاح
ذوب مدارات فرحة الوهج النضير
المزدهر .. بالإرتياح
.. فجأة إنحصد قبضة رياح
وسكت الكلام يا حلوة .. فى القول المباح
وغام الصباح .. بعدِك رحل
***
والكان أمل فى غيم سماك .. أيقنت إنـّو عدم بلاك
وإنـِّك قدر
وإنـّو البيحلم بى عُلاكْ
بختار ظروف أحلاها .. مُر
عينيكى لو تصدق معايا الأمنية
عينيكى .. لو أعرف خِتام الأغنية
بدء الكلام .. والمنتهى .. المستطاب والمشتهى
كل المباهج الفى المواويل .. والغنا
والعاشقيك قلبى .. وأنا
هزتنا فى عينيك تصاوير المنى
يا أمنيات من كم سنة
يا أغنيات كل الأماسى .. المستحيلة .. وممكنة
المستحيل عينيك تهون
البستحيل قلبك .. يخون
ما الغدر ما طبع الوفا
والصدق ما شرط .. إنتفى
وأنا حالى فى بعدك .. كفى
وأنا حالى من بعدك كفاهو ..
المغنى والحب .. والشجن
والوحشة والشوق للوطن
ما العمر قبلك ضاع سدىً
والعمر بعدك أيه يكون
لو يبقى بى حساب الزمن

أظـنــكِ عِـرفتــي - جمال حسن سعيد
أظنك عرفتى
عواصفك مهبـّى
أبارى فى خيالك .. يسوقنى ويودّى
ونهرك يعدى
ويجهل مصبّى
هواجسى البتزرع
وظنـّى البربى
***
لقيتك خواطر
بتصحى .. وتساور
وطيفك يزاور
وروحك تحاور
وروحك تحاور
موشـّح أساور
أقول بس نسيتك
وجرحك .. يتاوِر
***
أظنك عرفتى عذاب المغنى
وطبلو المجدّع
شظايا التمنى
حروفو البتجزع
فى لحظة تجنى
خطاهو البتهرع
متين تطمئنى
***
مسرِّج خيالك .. حصانى القبيل
معربد غبارو
وخلّى الصهيل
مسافر .. مسافر .. وفاقِد دليل
أظنـِّك عرفتى ..
أظنـِّك عرفتى ..

بين مريم الاخرى والمجدليه

هاهى الأرض تغطت بالتعب
البحار إتخذت شكل الفراغ

وأنا مقياس رسم

للتواصل والرحيل

وأنا الآن الترقب ..

وإنتظار المستحيل

أنجبتنى مريم الأخرى

قطاراً وحقيبة

أرضعتنى مريم الأخرى

قوافى ثم أهدتنى المنافى

هكذا قد خبرونى ..

ثم قالوا لى ترجـّل

***********

ثم أنتِ .. أنت ياكل

المحاور .. والدوائر

يا حكايات الصبا

تحفظين السر والمجد الذى

مابين نهديك .. إختبا

ليس يعنيك الذى قد ضاع

من عمرى هباء

وأنا .. لست أدرى ما الذى

يدفعنى دفعاً .. إليك

ما الذى يجعلنى أبدو حزيناً

حين أرتاد التسكع ..

فى مرايا وجنتيك

لا علي ... لا عليك

فعلى هذى السفوح .. المطمئنة

نحن قاتلنا سنيناً .. وأقتتلنا

نحن سجلنا التآلف ..

فى إنفعالات الأجنة

وأحتوانا البحر ..

والمد اليقاوم .. والشراع

يا هذه البنت التى

تمتد فى دنيايا سهلاً ..

وربوعاً .. وبقاع

ما الذى قد صبّ فى عينيك

شيئاً من تراجيديا الصراع

والمدى يمتد وجداً

عابراً هذى المدينة

خبرينى هل أنا أبدو حزينا؟

هل أنا القاتل .. والمقتول

حيناً .. والرهينة؟

هل أنا البحر الذى

لا يأمن الآن السفينة ؟

خبئينى بين جدران المسام

قبلينى مرةً فى كل عام

فأنا أشتاق أن أولد

فى عينيك..طفلا من جديد .

ارتدى اللون البنفسج

اعتلى شكل الهوية

آه لو تأتين اه وأتجاه

من عميق الموج

من صلب المياه

كالرحيل .. كالترقب ..

وإنتظار المستحيل

أسئلة ليست للإجابة


ما معنى أن نحيا .. ولا ندرى
بأن العشق قد يبقى سجيناً فى الخلايا
ما معنى أن نشهد موات الأغنيات
ما معنى هذا الصمت الذى لا ينتهى
وبرغم حوجتنا الصراخ
*** *** ***
هل يختفى الظل الذى لا ينتمى
إلا لمعرفتى وجهلى
وهل نودع بعضنا ونذهب فى سراب الذكريات
كيف تبدو الذكريات
كيف يبدو طعم أيام الشجن
من يعلم ذكريات كل أشكال التداعى ..
والرحيل المر دوماً
حين يختلط المدى بالمآسى .. والمخاوف
وأحتراق الأمنيات
*** *** ***
تعِبٌ هو البرق الذى لا يضيءُ أقبية الخبايا
لا ينتمى للسحبِ ..
والعشبُ الذى لا يرتوى
إلاّ بطعمك يا عصيراً من خليط الدهشةِ الأولي
وأحتراق الأغنيات

كان نفسي قولك من زمان - صلاح حاج سعيد


كان نفسى قولك من زمان
بالكاتمو فى سرى ومكتم
فى حشاى مدسوس سنين
كان نفسى قولك من زمان
بالشايلو فى عينى معزة وفى القلب
ريدا يخاف الغربة والشوق والحنين
زاملنى زى خاطر الفرح
وكتين يقاسم الهم عذاء
وقتين مدامعى تكون جزا
وتفتح مباهج الليل ظنون
* * *
كان نفسى قولك من زمان
سطوة محاسنك عندى ما كسرة جفون
وكت العيون تعبرنى زى خاطر المسا
سطوة محاسنك ما الرخام الفى الحرير
وكت الثغير يفجعنى بى حرفاً قسا
سطوة محاسنك عندى وكتين كبريائك ينهزم
لى طيبتى بى لفظة حنان
وكتين مشاعرك تنسجم فى عمرى
تنفح قلبى بى رعشة امان
سطوة محاسنك عندى وكتين شوقى يصبح فى هواك
ليل عزة ما بتعرف هوان
* * *
كان نفسى قولك من زمان
عينيك وحاتك غربتى وأهلى
وبلادى الفيها ضائع لى زمن..
عينيك وحاتك شوقى لى زولا ولوف..
من بعدو ساب عينى سهن
وأنا كنت دايرك من زمان
أشرح حكايتى معاك الِـف
أحكيك وأزيد القول ولف
وأتمنى لو قلبك عرف كان من زمان
من قبل مافى قلبى يتحكر
زمان الفرقة فى جرح لأسى
من قبل ما حرف الحقيقة الحلوة يتبدل عسى
ويصبح امانى كتيرة فى خاطر الحنان
كان نفسى اقولك من زمان

يا مطر عزالحريق



محمد الحسن سالم حميد




من الواسوق ابت تطلع
من الابرول ابت تطلع
مـن الاقلام ابت تطلع
من المدفع طلع خازوق
خوازيق البلد زادت
يفيض النيل نحيض نحنا
يظل حال البلد واقف تقع محنه
ولا النيل القديم ياهو ولا يانا
نعاين فى الجروف تنهد ولا يانا
رقاب تمر الجدود تنقص ولا يانا
متين ايد الغبش تتمد
لا قدام ..ولا قدام
تتش عين الضلام بالضو
تفرهد شتله لا هدام
ولا فيضا يفوت الحد
عقب يا نيل تكون ياكا
ونكون اهل البلد بالجد
يا مطر عز الحريق
يا مصابيح الطريق
يا المراكبيه البتجبد من فك الموج الغريق
جينا ليك والشوق دفرنا
يا نشوق روحنا ودمرنا

يا المحطات الحنينه القصرت مشوار سفرنا

ياما شايلك بينى حايم
لا الليالى المخمليه
لا العمارات السوامق
لا الاسامى الاجنبيه
تمحى من عينى ملامحك
انت جاية المغربيه
داقسه دايشه المغربيه
وشك المكبوت مكندك
سمسونايتك زمزميه
كون شبر طوريه منجل
سبحه,فانوسا مدردح
قلتى بيهن لى زمانك
يازمان الحاجه عندك
يازمان الاهة حدك
لا تطأ الورده الصبيـه

أقراك مرة صاح

خلينى أقراك مرّة صاح..

عكس إحتشادك فى الحضور

هل غاب معاك وعى الطريق

أم بيكى زكـّانى الزمن

ماشيك .. وعارفك يا حريق ..

فى يوم غماماتك .. بجن

فرهد غيابك .. أغنيات

ظلت أراضى اللقيا بور

بلقاكى يا كل الطيور ..

مسجونة والحرية .. سور

وبلقاكى بيناتنا الثبات

وبيناتنا شمس البكرة

فى لحظة .. مخاض

***********

طول الوجع رشـّح

مواطن العافية .. فيك

خلانى أرجع وأبتديك

وأقراكى من كل الجهات

ومابين أقابلك .. ومشتهيك

كان حلمك الأول ترفْ

وكنتى الصبية الغايبة

فى زحمة حجا .. وكلمة شرف

كنتى الزوايا الميتة ..

فى متحف خزف

كنتى الوصايا العشرة

واللون الشحيح

********

سميت مساحاتتك حكر

كل البيحلمو بى الشمس

فجـّرت من واقعك .. عبث

سكـّنت فيك ..ضد السكون

كل اللى كان ممكن .. يكون

وطارت ضفيرتك ليل غنا

جدلة صبُر .. وطولة نفس

ومابين أقابلك ومشتهيك

ومابين أقابلك وجيت عليك

كان عندى ليك بس نحنّ

والجرح الثرى

وخيبة أمل أم الشهيد

دى الكلمة .. والوجه الجديد

وكان إحتقان نبض الزمن

نومة طفل .. فوق الدّمن

يا صاحية بى الحاصل علىْ

يا نايمة عن فقرى البليد

سميت مرافيك الوطن

صبحت مناحاتك .. نشيد